Дар маросими супоридани таҷҳизот директори Агентии амнияти химиявӣ, биологӣ, радиатсионӣ ва ядроии АМИТ, Мирсаидзода Илҳом ҳамчун ҳамоҳангсози татбиқи барномаҳои АБНА дар Ҷумҳурии Тоҷикистон ва директори Институти тибби ветеринарии Академияи миллии илмҳои Тоҷикистон, Атовуллозода Раҷабмурод иштирок намуданд.

Лоиҳаи зикргардида дар Институти тибби ветеринарии Академияи илмҳои кишоварзии Тоҷикистон аз соли 2019 татбиқ гардида истодааст. Дар ин муҳлат, озмоишгоҳҳои институт бо маблағгузории лоиҳа бо муосиртарин таҷҳизоту лавозимот, аз қабили боксҳои биологӣ, сентрофугаҳо, термостатҳо, яхдонҳои пастҳарорат (-40, -80), шейкерҳо, ридер ва ғ. муҷаҳҳаз гардонида шуданд.

Дар доираи лоиҳаи мазкур дар Институти тибби ветеринарӣ озмоишгоҳи замонавӣ мутобиқи меъёрҳои байналмилалӣ таҷҳизонида шуда, ҳамзамон низоми барқи офтобӣ насб гардидааст, ки имкони истифодаи таҷҳизоти ташхисиро аз ҳисоби нерӯи табиӣ фароҳам меорад.

Озмоишгоҳ аз ҳуҷраҳои санҷиши бемориҳои сироятӣ ва зоонозҳо бо истифода аз усулҳои анъанавӣ ва муосир (ELISA, real time RT-PCR), ҳуҷраҳои ҷудосозии бактерияҳо ва вирусҳо иборат мебошад.

Дар доираи лоиҳа 5 нафар мутахассисони ҷавони институт дар Македонияи Шимолӣ ва 1 нафар дар Австрия таҷрибаомӯзӣ гузашта, баъди такмили ихтисос ва омӯзиши навгониҳои илми тибби ветеринарӣ дар раванди фаъолият дар Институти тибби ветеринарӣ бо истифода аз таҷҳизоту технологияҳои нав бемориҳои сироятии ҳайвонот, аз он ҷумла зоонозҳоро ташхис мегузаронанд.

Мусаллам аст, ки таҷҳизоти дастрасшуда барои мониторинги бемориҳои сироятӣ, бахусус зоонозҳо ва зери назорат гирифтани вазъи эпизоотӣ дар байни ҳайвоноти хонагӣ ва ваҳшӣ самараи хуб ба бор меорад.